有感而發：
剛剛食早餐，見倒有個阿爸係咁話個女唔得，個女應該有十八九歲，一直dup低頭食早餐，個阿爸就一直係咁話佢。
內容大概如下：
你邊得架，讀嚟都嘥氣，你做乜都唔掂架，你邊得架，你話你有邊樣得吖？冇樣得架，唔係想睇死你，但你真係冇用架...
下刪無數咁多個唔得。
年紀大，特別易感觸，望住個女仔，我覺得佢好慘，連最親嘅人都一直係咁話你唔得，事問佢仲可以有咩信心？一個人乜嘢都可以輸，就係信心唔可以輸，信心輸咗真係乜嘢都唔會做得好。好想開囗幫個女仔，但又好似好多事，況且開囗話個阿爸，可能仲會俾佢鬧埋一份... 但唔開口又真係覺得個女仔好可憐，結果我扮跌咗隻🥄去佢嗰邊，然後執返，起身嗰吓我順勢拍拍佢背，然後向她微笑説了句：唔好意思呀！最後仲同佢單了一眼！
此時阿爸好似終於發現其實仲有其他人喺度，所以我執完🥄後，佢都冇再鬧喇。到我走嗰陣，個女仔望住我，我用囗型同佢講了句「加油」！
有時我覺得我係有d同情心過盛嘅，不過喺我成長過程中，真係有好多三唔識七嘅人都好無條件咁幫我，令我都好想幫吓人，有時一句鼓勵嘅說話，真係勝過千言萬語架。
#好老土不過係真架
#希望世界多一點愛
Search